Rev 15 | MHL | STEP | Aria naap ikok maa sira-sira oko aapereka iinan-pa imenareya urufam. Maa faa, onaiya akena-ke. Feenap, ensel ikur okaiwi-pa erup nain kuisow kuisow napuma samor akena wiowa maa nain opap ikemik. Napum samo-samora nain wi miiw mua wiiwkin miiwa sirirowa iiwawun weeserinon. Moram Mua Maneka miiw mua sirirowa iiwawun pepek weeser-wuomakikuan.

Revelation of John 15

Wi Mua Maneka unuma fakerami someka awemik

1 Aria naap ikok maa sira-sira oko aapereka iinan-pa imenareya urufam. Maa faa, onaiya akena-ke. Feenap, ensel ikur okaiwi-pa erup nain kuisow kuisow napuma samor akena wiowa maa nain opap ikemik. Napum samo-samora nain wi miiw mua wiiwkin miiwa sirirowa iiwawun weeserinon. Moram Mua Maneka miiw mua sirirowa iiwawun pepek weeser-wuomakikuan. 2 Ne maa oko feenap urufam, ifer maneka galas saarik nain mukun onaiya ikua. Ne wi teeria fain pun wia urufam, wi nain iiriw maa eneka asia ne ona miira siraremik nain nomakemik, aria ona unum siisia wiar fienap nomakemik, wi nain wia urufam. Wi teeria nain-ke ifera galas saarik nain pona-pa iimarep ikemik. Mua Maneka maa gita saarik nain wieya feekiya opap ikemik. 3 Maa nain opap ikok Mua Maneka uuwow mua Moses ne Sipsip Muuka ikos someka feenap nain wiar awem-ikemik:

“Oo Mua Maneka, yiena Maneka, kekanowa akena, no maa onin nain kekanowa onaiya ikua ne eliw akena! Miiw maneka fain Saria maneka nos, no opora ne sira maken akena-ke!
4 Maneka, naapeya wi mua kema nefa tootonep unuma nefa fakerimik nain, wi mua naap me onowa nain-ko ikemik-i? Moram no naisow melina ne dubila. No sira makena unowa nain ariman areya nefar urufimik. Naapeya miiw mua unowiya yiena Maneka-ke nefa naemi ekapep no nefa lotu onikuan.”
5 Maa nain weesereya feenap urufam, owow iinan Mua Maneka tempel koor Kemena Iwowa Emi nain aakiarep ikua. Iiriw eena Mua Maneka wi Yuuda opora wia maakep koonowak nain ilenowa epa nain. 6 Ne ensel ikur okaiwi-pa erup nain kuisow kuisow tempel koor kemena-pa ikok napuma samor akena wiowa maa nain feekiya opap oromik, maa nain miiw mua napuma samora wiikuan. Wi mia suuwowa kia maala melin akena arua saarik wiliniya nain suuwap inakirowa gol-pa onimik nain iiman epira-pa kaikamik. 7 Wi ensel teeria nain nan ikaiwkin maa erepam mokok enuma ikemik nain oko-ke iikirap gol epira porop wi ensel nain kuisow kuisow wie-ikiwok. Mua Maneka anane ikaiya nain bagiaw-ke epira nan taanep ikua, napum samo-samora wiowa nain. 8 Ne Mua Maneka parin maneka ne kekanowa nain-ke kawus saarik imenarep tempel koor kemena epa iiwawun aawok. Mua kuisow kemena ikiwowa me pepek, wi ensel ikur okaiwi-pa erup nain kuisow kuisow miiw mua napuma wie-ikiwep iiwawun welawiwkin eliw kemena ikiwikuan.